zarra zarra hai ise mehr-e-munawwar na kaho

zarra zarra hai ise mehr-e-munavvar na kaho

qatra har haal meñ qatra hai samundar na kaho

but-e-tannāz ko iḳhlās kā paikar na kaho

dushman-e-mehr-o-vafā ko fan-e-āzar na kaho

kahīñ phūTī hai kabhī un se vafā kī ḳhushbū

lab-e-ma.ashūq ko aurāq-e-gul-e-tar na kaho

rañg aur nasl kī tafrīq miTāne ke liye

maslahat hai ise behtar use kamtar na kaho

ġham kī jab aañch lagegī to pighal jā.egā

dil to ik shīsha hai is shīshe ko patthar na kaho

saath taqdīr ke tadbīr zarūrī hai 'habāb'

bigḌe hālāt ko tum apnā muqaddar na kaho

zarra zarra hai ise mehr-e-munawwar na kaho

qatra har haal mein qatra hai samundar na kaho

but-e-tannaz ko iKHlas ka paikar na kaho

dushman-e-mehr-o-wafa ko fan-e-azar na kaho

kahin phuTi hai kabhi un se wafa ki KHushbu

lab-e-mashuq ko auraq-e-gul-e-tar na kaho

rang aur nasl ki tafriq miTane ke liye

maslahat hai ise behtar use kamtar na kaho

gham ki jab aanch lagegi to pighal jaega

dil to ek shisha hai is shishe ko patthar na kaho

sath taqdir ke tadbir zaruri hai 'habab'

bigDe haalat ko tum apna muqaddar na kaho