zauq-e-nazar ko izn-e-nazara na mil saka

zauq-e-nazar ko izn-e-nazāra na mil sakā

tanhā kabhī vo anjuman-ārā na mil sakā

ham par to jald khul gayā sāhil kā sab bharam

achchhe rahe vo jin ko kināra na mil sakā

yak-tarfa rābta hī nibhānā paḌā hameñ

un kī taraf se koī ishāra na mil sakā

tum bhī qusūr-vār nahīñ qissa muḳhtasar

merā tumhāre saath sitāra na mil sakā

shahroñ kī ḳhaak chhānī khañgāle haiñ dasht o dar

lekin hameñ surāġh hamārā na mil sakā

maiñ bhī thī ḳhud-pasand nahīñ is meñ shak koī

aksar to par mizāj tumhārā na mil sakā

ai kaash sāthiyoñ se vo apne kabhī kahe

'shabnam' sā koī mujh ko dobāra na mil sakā

zauq-e-nazar ko izn-e-nazara na mil saka

tanha kabhi wo anjuman-ara na mil saka

hum par to jald khul gaya sahil ka sab bharam

achchhe rahe wo jin ko kinara na mil saka

yak-tarfa rabta hi nibhana paDa hamein

un ki taraf se koi ishaara na mil saka

tum bhi qusur-war nahin qissa muKHtasar

mera tumhaare sath sitara na mil saka

shahron ki KHak chhani khangale hain dasht o dar

lekin hamein suragh hamara na mil saka

main bhi thi KHud-pasand nahin is mein shak koi

aksar to par mizaj tumhaara na mil saka

ai kash sathiyon se wo apne kabhi kahe

'shabnam' sa koi mujh ko dobara na mil saka