zauq-e-numu ko manzil-e-dost mein aa ke bhul ja

zauq-e-numū ko manzil-e-dost meñ aa ke bhuul jā

is tarah be-niyāz ho sar ko jhukā ke bhuul jā

dāġh-e-firāq ke sivā hāsil-e-ishq kuchh nahīñ

parda-e-jān-o-dil meñ ye sham' jalā ke bhuul jā

us ke harīm-e-nāz tak koī pahuñch sakā kahāñ

rāhguzār-e-shauq kī ḳhaak uḌā ke bhuul jā

halqa-ba-gosh-e-ishq ho phir na zavāl hai na maut

paik-e-qazā pe āḳhirī tiir chalā ke bhuul jā

bazm meñ ai nigāh-e-dost is tarah ahl-e-dil se khel

is ko miTā ke bhuul jā us ko banā ke bhuul jā

aa.e ḳhizāñ meñ jo kabhī yaad tujhe bahār kī

sāġhar-e-chashm-e-tar se do ashk bahā ke bhuul jā

dil bhī ḳharāb-e-ishq hai dil ko bhī de sazā-e-shauq

is ko bhī tuur kī tarah aag lagā ke bhuul jā

hasrat-e-dīd meñ jo hai diid meñ vo maza nahīñ

parda-e-rū-e-dost uTThā aur uTThā ke bhuul jā

tū bhī dayār-e-dost meñ shauq ke zamzame alaap

bād-e-shimāl kī tarah Thokareñ khā ke bhuul jā

satvat-e-qaisarāna ko shaukat-e-ḳhusravāna ko

jām-e-sharāb-e-shq se hoñT milā ke bhuul jā

merī ġhazal meñ hai 'zafar' lutf ba-qadr-e-zarf-e-zauq

tū use gā ke jhuum uTh yā use gā ke bhuul jā

zauq-e-numu ko manzil-e-dost mein aa ke bhul ja

is tarah be-niyaz ho sar ko jhuka ke bhul ja

dagh-e-firaq ke siwa hasil-e-ishq kuchh nahin

parda-e-jaan-o-dil mein ye sham' jala ke bhul ja

us ke harim-e-naz tak koi pahunch saka kahan

rahguzar-e-shauq ki KHak uDa ke bhul ja

halqa-ba-gosh-e-ishq ho phir na zawal hai na maut

paik-e-qaza pe aaKHiri tir chala ke bhul ja

bazm mein ai nigah-e-dost is tarah ahl-e-dil se khel

is ko miTa ke bhul ja us ko bana ke bhul ja

aae KHizan mein jo kabhi yaad tujhe bahaar ki

saghar-e-chashm-e-tar se do ashk baha ke bhul ja

dil bhi KHarab-e-ishq hai dil ko bhi de saza-e-shauq

is ko bhi tur ki tarah aag laga ke bhul ja

hasrat-e-did mein jo hai did mein wo maza nahin

parda-e-ru-e-dost uTTha aur uTTha ke bhul ja

tu bhi dayar-e-dost mein shauq ke zamzame alap

baad-e-shimal ki tarah Thokaren kha ke bhul ja

satwat-e-qaisarana ko shaukat-e-KHusrawana ko

jam-e-sharab-e-shq se honT mila ke bhul ja

meri ghazal mein hai 'zafar' lutf ba-qadr-e-zarf-e-zauq

tu use ga ke jhum uTh ya use ga ke bhul ja