zawal-e-ghairat-e-ahl-e-sharaf pe kya kahiye

zavāl-e-ġhairat-e-ahl-e-sharaf pe kyā kahiye

chalī hai rasm ki fir.aun ko ḳhudā kahiye

fuġhān-e-murġh ko nāqūs kī sadā kahiye

uThe chaman se dhuāñ to use ghaTā kahiye

har ik himāqat-e-hākim pe vāh-vā kahiye

vo laakh jhūTh kahe aap marhabā kahiye

bacheñ vabā se to hākim ko shukriya kahiye

mareñ vabā se to allah kī thī razā kahiye

kare savāl jo hākim se hai adū-e-vatan

kahe jo jhūTh ko jhūTh us ko kaj-adā kahiye

qatīl hizb-e-muḳhālif se ho to us par hī

lagā ke tohmateñ, qātil ko marhabā kahiye

ye vaqt hai baḌā nāzuk zarā sañbhal ke 'sadā'

hai ḳhair isī meñ ki rahzan ko rahnumā kahiye

zawal-e-ghairat-e-ahl-e-sharaf pe kya kahiye

chali hai rasm ki firaun ko KHuda kahiye

fughan-e-murgh ko naqus ki sada kahiye

uThe chaman se dhuan to use ghaTa kahiye

har ek himaqat-e-hakim pe wah-wa kahiye

wo lakh jhuTh kahe aap marhaba kahiye

bachen waba se to hakim ko shukriya kahiye

maren waba se to allah ki thi raza kahiye

kare sawal jo hakim se hai adu-e-watan

kahe jo jhuTh ko jhuTh us ko kaj-ada kahiye

qatil hizb-e-muKHalif se ho to us par hi

laga ke tohmaten, qatil ko marhaba kahiye

ye waqt hai baDa nazuk zara sanbhal ke 'sada'

hai KHair isi mein ki rahzan ko rahnuma kahiye