zehn mein nagah hairat aa gai

zehn meñ nāgāh hairat aa ga.ī

sāmne jab un kī ulfat aa ga.ī

dī sazā munsif ne bhī mazlūm ko

jeb meñ jab us ke daulat aa ga.ī

kis ko ham achchhā kaheñ kis ko burā

sāmne khul kar haqīqat aa ga.ī

har taraf be-rozgārī dekhiye

le ke mahñgā.ī hukūmat aa ga.ī

dil meñ nafrat har nazar meñ hai ḳhalish

ab dikhāve kī mohabbat aa ga.ī

muntaḳhab jab se unheñ rahbar kiyā

kārvāñ par to musībat aa ga.ī

maañ kī ḳhidmat kar rahā huuñ maiñ 'samar'

yuuñ nahīñ qismat meñ jannat aa ga.ī

zehn mein nagah hairat aa gai

samne jab un ki ulfat aa gai

di saza munsif ne bhi mazlum ko

jeb mein jab us ke daulat aa gai

kis ko hum achchha kahen kis ko bura

samne khul kar haqiqat aa gai

har taraf be-rozgari dekhiye

le ke mahngai hukumat aa gai

dil mein nafrat har nazar mein hai KHalish

ab dikhawe ki mohabbat aa gai

muntaKHab jab se unhen rahbar kiya

karwan par to musibat aa gai

man ki KHidmat kar raha hun main 'samar'

yun nahin qismat mein jannat aa gai