zehnon mein maslahat hai dilon mein umang hai

zehnoñ meñ maslahat hai diloñ meñ umang hai

barpā harīm-e-shauq meñ ik sard jang hai

chehra udaas dil meñ ghuTan 'aql dang hai

TuuTā huā hayāt kā ek ek ang hai

kyā inqilāb-e-vaqt hai kyā dekhtā huuñ maiñ

shīsha-girān-e-shahr ke hāthoñ meñ sang hai

ab kaise ḳhār-o-gul meñ kare koī imtiyāz

jo gul kā rang hai vahī kāñToñ kā rang hai

har phuul zaḳhm zaḳhm shagūfa lahū lahū

shāyad bahār ab ke baras ḳhūñ-tarang hai

nāmūs-e-bazm-e-dīda-o-dil thā jo vo suḳhan

lauh-e-jabīn-e-shauq pe ab harf-e-nang hai

lafz-o-bayāñ meñ kho ga.e sab ahl-e-fan 'azīz'

baaqī tumhāre dam se taġhazzul kā rang hai

zehnon mein maslahat hai dilon mein umang hai

barpa harim-e-shauq mein ek sard jang hai

chehra udas dil mein ghuTan 'aql dang hai

TuTa hua hayat ka ek ek ang hai

kya inqilab-e-waqt hai kya dekhta hun main

shisha-giran-e-shahr ke hathon mein sang hai

ab kaise KHar-o-gul mein kare koi imtiyaz

jo gul ka rang hai wahi kanTon ka rang hai

har phul zaKHm zaKHm shagufa lahu lahu

shayad bahaar ab ke baras KHun-tarang hai

namus-e-bazm-e-dida-o-dil tha jo wo suKHan

lauh-e-jabin-e-shauq pe ab harf-e-nang hai

lafz-o-bayan mein kho gae sab ahl-e-fan 'aziz'

baqi tumhaare dam se taghazzul ka rang hai