zer-e-zamin jo mujhko hawas aasman ki hai

zer-e-zamīñ jo mujh ko havas āsmāñ kī hai

shāyad ye musht-e-ḳhāk tire āstāñ kī hai

kartā huuñ jam' be-sar-o-sāmāniyāñ kahīñ

bijlī ko phir talāsh mire āshiyāñ kī hai

tū bhī agar nahīñ na sahī chashm-e-iltifāt

mujh par nigāh-e-lutf ġham-e-jāvedāñ kī hai

ik rāz-e-nā-kashūda huuñ ik harf-e-nā-tamām

takmīl-e-rāz mujh pe mire rāz-dāñ kī hai

gum kar chukā huuñ pā-e-jihat-āshnā ko bhī

lekin na khul sakā ki tamanna kahāñ kī hai

kyā maut ne bhī siikh liye dilbarī ke Dhang

ye tarz-e-be-ruḳhī to us ārām-e-jāñ kī hai

qaa.em vaqār-e-'ishq 'nazar' jis ke dam se thā

ye turbat-e-shikasta usī naujavāñ kī hai

zer-e-zamin jo mujh ko hawas aasman ki hai

shayad ye musht-e-KHak tere aastan ki hai

karta hun jam' be-sar-o-samaniyan kahin

bijli ko phir talash mere aashiyan ki hai

tu bhi agar nahin na sahi chashm-e-iltifat

mujh par nigah-e-lutf gham-e-jawedan ki hai

ek raaz-e-na-kashuda hun ek harf-e-na-tamam

takmil-e-raaz mujh pe mere raaz-dan ki hai

gum kar chuka hun pa-e-jihat-ashna ko bhi

lekin na khul saka ki tamanna kahan ki hai

kya maut ne bhi sikh liye dilbari ke Dhang

ye tarz-e-be-ruKHi to us aaram-e-jaan ki hai

qaem waqar-e-'ishq 'nazar' jis ke dam se tha

ye turbat-e-shikasta usi naujawan ki hai