zid hai unhen pura mera arman na karenge

zid hai unheñ puurā mirā armāñ na kareñge

muñh se jo nahīñ niklī hai ab haañ na kareñge

kyuuñ zulf kā bosa mujhe lene nahīñ dete

kahte haiñ ki vallāh pareshāñ na kareñge

hai zehan meñ ik baat tumhāre muta.alliq

ḳhalvat meñ jo pūchhoge to pinhāñ na kareñge

vaa.iz to banāte haiñ musalmān ko kāfir

afsos ye kāfir ko musalmāñ na kareñge

kyuuñ shukr-guzārī kā mujhe shauq hai itnā

suntā huuñ vo mujh par koī ehsāñ na kareñge

dīvāna na samjhe hameñ vo samjhe sharābī

ab chaak kabhī jeb o garebāñ na kareñge

vo jānte haiñ ġhair mire ghar meñ hai mehmāñ

ā.eñge to mujh par koī ehsāñ na kareñge

zid hai unhen pura mera arman na karenge

munh se jo nahin nikli hai ab han na karenge

kyun zulf ka bosa mujhe lene nahin dete

kahte hain ki wallah pareshan na karenge

hai zehan mein ek baat tumhaare mutalliq

KHalwat mein jo puchhoge to pinhan na karenge

waiz to banate hain musalman ko kafir

afsos ye kafir ko musalman na karenge

kyun shukr-guzari ka mujhe shauq hai itna

sunta hun wo mujh par koi ehsan na karenge

diwana na samjhe hamein wo samjhe sharabi

ab chaak kabhi jeb o gareban na karenge

wo jaante hain ghair mere ghar mein hai mehman

aaenge to mujh par koi ehsan na karenge