zinat-e-bazm-e-gul-ruKHan hoga

zīnat-e-bazm-e-gul-ruḳhāñ hogā

vo jo rad-karda-e-jahāñ hogā

kuchh na socho rah-e-mohabbat meñ

jo bhī hogā vo nā-gahāñ hogā

phir vo nikle nazar churā.e hue

phir kahīñ qatl-e-āshiqāñ hogā

zaḳhm-e-dil jo khulā nahīñ ab tak

vahī terā mizāj-dāñ hogā

muddatoñ se sabā nahīñ aa.ī

jaane kyā hāl-e-mahvashāñ hogā

baḌh ke un madh-bharī nigāhoñ se

kyā koī jām-e-arġhavāñ hogā

terā va.ada vafā huā bhī to kyā

terā 'iqbāl' phir kahāñ hogā

zinat-e-bazm-e-gul-ruKHan hoga

wo jo rad-karda-e-jahan hoga

kuchh na socho rah-e-mohabbat mein

jo bhi hoga wo na-gahan hoga

phir wo nikle nazar churae hue

phir kahin qatl-e-ashiqan hoga

zaKHm-e-dil jo khula nahin ab tak

wahi tera mizaj-dan hoga

muddaton se saba nahin aai

jaane kya haal-e-mahwashan hoga

baDh ke un madh-bhari nigahon se

kya koi jam-e-arghawan hoga

tera wada wafa hua bhi to kya

tera 'iqbaal' phir kahan hoga