zinat-e-shahr-e-wafa ku-e-butan hain kuchh log

zīnat-e-shahr-e-vafā kū-e-butāñ haiñ kuchh log

naqsh dhuñdle hī sahī sajda-kunāñ haiñ kuchh log

sāf-go pāk-nazar narm-zabāñ haiñ kuchh log

tab-e-nāzuk pe magar phir bhī girāñ haiñ kuchh log

sham-e-ehsās kī lau aur zarā tez karo

duur rah kar bhī qarīb-e-rag-e-jāñ haiñ kuchh log

aap kī merī vafāoñ kā yahāñ zikr hī kyā

miT ga.e aise ki qadmoñ ke nishāñ haiñ kuchh log

duur tak koī tasallī na kisī kā dāman

kis tavaqqo pe bhalā ashk-fishāñ haiñ kuchh log

apnī marzī se na hañste haiñ na ro sakte haiñ

aap kī bazm meñ aise bhī yahāñ haiñ kuchh log

kis ko andāza hai majrūh diloñ kā yaaro

bazm-e-ishrat meñ bhī mā.il-ba-fuġhāñ haiñ kuchh log

jiite jī un kā kabhī naam na lūñgā 'nayyar'

ḳhūn-e-tāza kī tarah dil meñ ravāñ haiñ kuchh log

zinat-e-shahr-e-wafa ku-e-butan hain kuchh log

naqsh dhundle hi sahi sajda-kunan hain kuchh log

saf-go pak-nazar narm-zaban hain kuchh log

tab-e-nazuk pe magar phir bhi giran hain kuchh log

sham-e-ehsas ki lau aur zara tez karo

dur rah kar bhi qarib-e-rag-e-jaan hain kuchh log

aap ki meri wafaon ka yahan zikr hi kya

miT gae aise ki qadmon ke nishan hain kuchh log

dur tak koi tasalli na kisi ka daman

kis tawaqqo pe bhala ashk-fishan hain kuchh log

apni marzi se na hanste hain na ro sakte hain

aap ki bazm mein aise bhi yahan hain kuchh log

kis ko andaza hai majruh dilon ka yaro

bazm-e-ishrat mein bhi mail-ba-fughan hain kuchh log

jite ji un ka kabhi nam na lunga 'nayyar'

KHun-e-taza ki tarah dil mein rawan hain kuchh log