zist ki tarik rahon mein diya koi nahin

ziist kī tārīk rāhoñ meñ diyā koī nahīñ

is safar meñ juz ġham-e-dil rahnumā koī nahīñ

ham kisī isikandar-o-dārā kā khā.eñ kyoñ fareb

ham qalandar haiñ hamārā mudda.ā koī nahīñ

ek tum saarī ḳhudā.ī jis kī hai halqa-ba-gosh

aur mere zulmat-kade meñ dūsrā koī nahīñ

kaun is naqqār-ḳhāne meñ sunegā dosto

ik shikasta shīsha-e-dil kī sadā koī nahīñ

kis se tujh ko ai ġham-e-jānāñ bhalā tashbīh deñ

itnī dilkash to dhanak ḳhushbū sabā koī nahīñ

ai butān-e-shahr is vaz.a-e-kuhan ko kyā huā

tum meñ ab ishva-tarāz o kaj-adā koī nahīñ

maiñ ne ḳhud apnī asīrī shauq se manzūr kī

dosto sayyād kī is meñ ḳhatā koī nahīñ

ḳhāk-e-pā-e-gul-ruḳhāñ āvāra-e-kū-e-butāñ

in dinoñ 'jābir' sā mard-e-pārsā koī nahīñ

zist ki tarik rahon mein diya koi nahin

is safar mein juz gham-e-dil rahnuma koi nahin

hum kisi isikandar-o-dara ka khaen kyon fareb

hum qalandar hain hamara muddaa koi nahin

ek tum sari KHudai jis ki hai halqa-ba-gosh

aur mere zulmat-kade mein dusra koi nahin

kaun is naqqar-KHane mein sunega dosto

ek shikasta shisha-e-dil ki sada koi nahin

kis se tujh ko ai gham-e-jaanan bhala tashbih den

itni dilkash to dhanak KHushbu saba koi nahin

ai butan-e-shahr is waza-e-kuhan ko kya hua

tum mein ab ishwa-taraaz o kaj-ada koi nahin

main ne KHud apni asiri shauq se manzur ki

dosto sayyaad ki is mein KHata koi nahin

KHak-e-pa-e-gul-ruKHan aawara-e-ku-e-butan

in dinon 'jabir' sa mard-e-parsa koi nahin