zikr-e-tufan bhi abas hai mutmain hai dil mera

zikr-e-tūfāñ bhī abas hai mutma.in hai dil mirā

nāḳhudā tum ho to phir dariyā mirā sāhil mirā

rahnumā-e-zindagī hai iztirāb-e-dil mirā

chal rahā hai kārvāñ manzil pas-e-manzil mirā

qissa-e-mansūr ho yā dāstān-e-kohkan

jo fasāna dekhiye ik baab hai shāmil mirā

mil rahā hai zindagī ko aaj unvāñ sahī

munfa.il kyuuñ ho nasīb-e-dushmanāñ qātil mirā

chand zarre ḳhāk-e-ādam se azal meñ bach ga.e

fitrat-e-ma.asūm ne in se banāyā dil mirā

āfiyat hai merī fitrat ke munāfī ai 'rashīd'

varna aayā thā safīna jānib-e-sāhil mirā

zikr-e-tufan bhi abas hai mutmain hai dil mera

naKHuda tum ho to phir dariya mera sahil mera

rahnuma-e-zindagi hai iztirab-e-dil mera

chal raha hai karwan manzil pas-e-manzil mera

qissa-e-mansur ho ya dastan-e-kohkan

jo fasana dekhiye ek bab hai shamil mera

mil raha hai zindagi ko aaj unwan sahi

munfail kyun ho nasib-e-dushmanan qatil mera

chand zarre KHak-e-adam se azal mein bach gae

fitrat-e-masum ne in se banaya dil mera

aafiyat hai meri fitrat ke munafi ai 'rashid'

warna aaya tha safina jaanib-e-sahil mera