zikr-e-wafa kab ek fasana hai aaj-kal

zikr-e-vafā kab ek fasāna hai āj-kal

mar ke nahīñ to jī ke dikhānā hai āj-kal

jis dil ko dekho in kā nishāna hai āj-kal

jaise inhīñ butoñ kā zamāna hai āj-kal

kis kī zabāñ pe zikr mire 'ishq kā nahīñ

dekho na ek lafz fasāna hai āj-kal

mujh ko miTā ke is tarah se mutma.in vo haiñ

jaise savāb zulm kā Dhānā hai āj-kal

marnā dalīl-e-amn hai takmīl-e-amn hai

jiinā mirī nazar meñ bahāna hai āj-kal

mujh ko satā ke dekh le ai nā-sipās vaqt

mere liye malāl tarāna hai āj-kal

zulfoñ ke bal nikāl na de to sahī huzūr

har-chand dast-e-nāznīñ shānā hai āj-kal

tujh ko hañsī na aa.egī to kis ko aa.egī

ai inqilāb terā zamāna hai āj-kal

ham aur dil kī baat kaheñ tauba kījiye

ḳhud jumbish-e-nigāh fasāna hai āj-kal

'rāfat' hamīñ ko ḳhud nahīñ islāh kī tamīz

kyoñ kahiye kajravī pe zamāna hai āj-kal

zikr-e-wafa kab ek fasana hai aaj-kal

mar ke nahin to ji ke dikhana hai aaj-kal

jis dil ko dekho in ka nishana hai aaj-kal

jaise inhin buton ka zamana hai aaj-kal

kis ki zaban pe zikr mere 'ishq ka nahin

dekho na ek lafz fasana hai aaj-kal

mujh ko miTa ke is tarah se mutmain wo hain

jaise sawab zulm ka Dhana hai aaj-kal

marna dalil-e-amn hai takmil-e-amn hai

jina meri nazar mein bahana hai aaj-kal

mujh ko sata ke dekh le ai na-sipas waqt

mere liye malal tarana hai aaj-kal

zulfon ke bal nikal na de to sahi huzur

har-chand dast-e-naznin shana hai aaj-kal

tujh ko hansi na aaegi to kis ko aaegi

ai inqilab tera zamana hai aaj-kal

hum aur dil ki baat kahen tauba kijiye

KHud jumbish-e-nigah fasana hai aaj-kal

'rafat' hamin ko KHud nahin islah ki tamiz

kyon kahiye kajrawi pe zamana hai aaj-kal