zikr mera kahan nahin hota

zikr merā kahāñ nahīñ hotā

vo jahāñ haiñ vahāñ nahīñ hotā

dil ke sho.ale to bujh ga.e dil meñ

shahr-e-ġham meñ dhuāñ nahīñ hotā

harf ik rāz-e-ġham hai chhoTā sā

vo bhī dil meñ nihāñ nahīñ hotā

miim ke sar pe ain ik nuqta

ye bhī nukta bayāñ nahīñ hotā

aaj mahfil meñ chup vo baiThe haiñ

varna kyā kyā bayāñ nahīñ hotā

dostī ho ga.ī havādis se

jab koī mehrbāñ nahīñ hotā

dasht apne liye nasheman hai

raas jab gulsitāñ nahīñ hotā

din meñ aa.eñ vo kaise mere ghar

raah meñ kahkashāñ nahīñ hotā

rāh-e-ulfat se baaz aa 'dīvān'

is meñ manzil-nishāñ nahīñ hotā

zikr mera kahan nahin hota

wo jahan hain wahan nahin hota

dil ke shoale to bujh gae dil mein

shahr-e-gham mein dhuan nahin hota

harf ek raaz-e-gham hai chhoTa sa

wo bhi dil mein nihan nahin hota

mim ke sar pe ain ek nuqta

ye bhi nukta bayan nahin hota

aaj mahfil mein chup wo baiThe hain

warna kya kya bayan nahin hota

dosti ho gai hawadis se

jab koi mehrban nahin hota

dasht apne liye nasheman hai

ras jab gulsitan nahin hota

din mein aaen wo kaise mere ghar

rah mein kahkashan nahin hota

rah-e-ulfat se baz aa 'diwan'

is mein manzil-nishan nahin hota