zinda hun aur hijr ka aazar tak nahin

zinda huuñ aur hijr kā āzār tak nahīñ

vo kaam kar rahā huuñ jo dushvār tak nahīñ

ab maiñ huuñ aur tujh ko manāne kī justujū

kuchh bhī nahīñ hai raah meñ pindār tak nahīñ

ya.anī mirā vajūd hī mashkūk ho gayā

ab to maiñ apne-āp se bezār tak nahīñ

dil bhī thakan se chuur huā aur dimāġh bhī

aur āsmāñ pe sub.h ke āsār tak nahīñ

iqrār kar ke us ko nibhānā kise nasīb

is umr meñ to mohlat-e-inkār tak nahīñ

thī jis kī por por mirī lams-āshnā

ab yaad us ke gesū-o-ruḳhsār tak nahīñ

is be-karāñ ḳhalā meñ nigāhoñ ko kyā karūñ

ab to nazar ke sāmne dīvār tak nahīñ

zinda hun aur hijr ka aazar tak nahin

wo kaam kar raha hun jo dushwar tak nahin

ab main hun aur tujh ko manane ki justuju

kuchh bhi nahin hai rah mein pindar tak nahin

yani mera wajud hi mashkuk ho gaya

ab to main apne-ap se bezar tak nahin

dil bhi thakan se chur hua aur dimagh bhi

aur aasman pe subh ke aasar tak nahin

iqrar kar ke us ko nibhana kise nasib

is umr mein to mohlat-e-inkar tak nahin

thi jis ki por por meri lams-ashna

ab yaad us ke gesu-o-ruKHsar tak nahin

is be-karan KHala mein nigahon ko kya karun

ab to nazar ke samne diwar tak nahin