zinda rahne ki talab is liye pyari na rahi

zinda rahne kī talab is liye pyārī na rahī

koī vaq'at dil-e-qātil meñ hamārī na rahī

mai-kashī chhoḌ dī is vāste ham ne saaqī

pahle jaisī tirī āñkhoñ meñ ḳhumārī na rahī

niiñd kā zahr nigāhoñ meñ samāyā jab se

ratjagoñ se mirī bā-zābta yaarī na rahī

āḳhirash aa hī gayā kushta-e-hasrat ko qarār

'umr-bhar lazzat-e-āvārgī taarī na rahī

sīkhtā kis tarah ā.īn-e-junūñ ke ādāb

mujh pe maa.il ba-karam diid tumhārī na rahī

shiddat-e-zabt se pathrā ga.iiñ āñkheñ bhī 'nadīm'

ġham rahā saath meñ par girya-o-zārī na rahī

zinda rahne ki talab is liye pyari na rahi

koi waq'at dil-e-qatil mein hamari na rahi

mai-kashi chhoD di is waste hum ne saqi

pahle jaisi teri aankhon mein KHumari na rahi

nind ka zahr nigahon mein samaya jab se

ratjagon se meri ba-zabta yari na rahi

aaKHirash aa hi gaya kushta-e-hasrat ko qarar

'umr-bhar lazzat-e-awargi tari na rahi

sikhta kis tarah aain-e-junun ke aadab

mujh pe mail ba-karam did tumhaari na rahi

shiddat-e-zabt se pathra gain aankhen bhi 'nadim'

gham raha sath mein par girya-o-zari na rahi