zinda rahne mein hun shamil aur na mar jaane mein hun

zinda rahne meñ huuñ shāmil aur na mar jaane meñ huuñ

sūrat-e-tasvīr meñ bhī ā.ina-ḳhāne meñ huuñ

yā ba-shakl-e-jins huuñ hissa kisī bāzār kā

yā kisī kirdār kā mānind afsāne kā huuñ

ek pal huuñ sikka-e-rā.ej ba-tuzk-o-ihtishām

dūsre pal kauḌiyoñ ke mol bik jaane ko huuñ

hai ḳhasāra hī ḳhasāra saarī hastī sab vajūd

maiñ bhī shāmil huuñ usī meñ aur harjāne meñ huuñ

huuñ kabhī maiñ sāġhar-e-sairābī-e-kaun-o-makāñ

tishnagī ban kar kabhī hastī ke paimāne meñ huuñ

nā-murādāna hī sargarm-e-amal huuñ dahr meñ

maiñ na paane ke taqāze meñ na kho jaane meñ huuñ

zinda rahne mein hun shamil aur na mar jaane mein hun

surat-e-taswir mein bhi aaina-KHane mein hun

ya ba-shakl-e-jins hun hissa kisi bazar ka

ya kisi kirdar ka manind afsane ka hun

ek pal hun sikka-e-raej ba-tuzk-o-ihtisham

dusre pal kauDiyon ke mol bik jaane ko hun

hai KHasara hi KHasara sari hasti sab wajud

main bhi shamil hun usi mein aur harjaane mein hun

hun kabhi main saghar-e-sairabi-e-kaun-o-makan

tishnagi ban kar kabhi hasti ke paimane mein hun

na-muradana hi sargarm-e-amal hun dahr mein

main na pane ke taqaze mein na kho jaane mein hun