زندہ رہنے میں ہوں شامل اور نہ مر جانے میں ہوں

زندہ رہنے میں ہوں شامل اور نہ مر جانے میں ہوں

صورت تصویر میں بھی آئنہ خانے میں ہوں

یا بہ شکل جنس ہوں حصہ کسی بازار کا

یا کسی کردار کا مانند افسانے کا ہوں

ایک پل ہوں سکۂ رائج بہ تزک و احتشام

دوسرے پل کوڑیوں کے مول بک جانے کو ہوں

ہے خسارہ ہی خسارہ ساری ہستی سب وجود

میں بھی شامل ہوں اسی میں اور ہرجانے میں ہوں

ہوں کبھی میں ساغر سیرابیٔ کون و مکاں

تشنگی بن کر کبھی ہستی کے پیمانے میں ہوں

نامرادانہ ہی سرگرم عمل ہوں دہر میں

میں نہ پانے کے تقاضے میں نہ کھو جانے میں ہوں