zindan-e-subh-o-sham mein tu bhi hai main bhi hun

zindān-e-sub.h-o-shām meñ tū bhī hai maiñ bhī huuñ

ik gardish-e-mudām meñ tū bhī hai maiñ bhī huuñ

be-farsh-o-bām silsila-e-kā.enāt ke

is be-sutūñ nizām meñ tū bhī hai maiñ bhī huuñ

be-sāl-o-sin zamānoñ meñ phaile hue haiñ ham

be-rañg-o-nasl naam meñ tū bhī hai maiñ bhī huuñ

is dā.imī hisār meñ ham ko mafar kahāñ

zarroñ ke azhdahām meñ tū bhī hai maiñ bhī huuñ

har tīrah-fām sub.h kā virsa hai mushtarak

har nūr-dīda shaam meñ tū bhī hai maiñ bhī huuñ

zindan-e-subh-o-sham mein tu bhi hai main bhi hun

ek gardish-e-mudam mein tu bhi hai main bhi hun

be-farsh-o-baam silsila-e-kaenat ke

is be-sutun nizam mein tu bhi hai main bhi hun

be-sal-o-sin zamanon mein phaile hue hain hum

be-rang-o-nasl nam mein tu bhi hai main bhi hun

is daimi hisar mein hum ko mafar kahan

zarron ke azhdaham mein tu bhi hai main bhi hun

har tirah-fam subh ka wirsa hai mushtarak

har nur-dida sham mein tu bhi hai main bhi hun