zindagi apni kaamyab nahin

zindagī apnī kāmyāb nahīñ

ġham-e-daurāñ kā kuchh hisāb nahīñ

dard jis meñ na ho vo dil kaisā

naaz jis meñ na ho shabāb nahīñ

mauj-e-dariyā ko chāhiye tezī

jo uThā.e na sar habāb nahīñ

dost terī harīm-e-aqdas meñ

ek banda hī bāryāb nahīñ

ḳhvāb-e-marg aa.egā zarūr ik din

ye haqīqat hai koī ḳhvāb nahīñ

tere bāb-e-qubūl par yārab

arz merī hī mustajāb nahīñ

kaam ye lā javāb karte ho

mere ḳhat kā koī javāb nahīñ

mere jurmoñ kā kuchh hisāb to hai

tere hī rahm kā hisāb nahīñ

kyā karūñ terī diid kī hasrat

jab mujhe dekhne kī taab nahīñ

dekh gahrī nazar se dariyā ko

koī aisī khulī kitāb nahīñ

tujh se bekas haiñ saikḌoñ 'nādir'

zer-e-gardūñ tū hī ḳharāb nahīñ

zindagi apni kaamyab nahin

gham-e-dauran ka kuchh hisab nahin

dard jis mein na ho wo dil kaisa

naz jis mein na ho shabab nahin

mauj-e-dariya ko chahiye tezi

jo uThae na sar habab nahin

dost teri harim-e-aqdas mein

ek banda hi baryab nahin

KHwab-e-marg aaega zarur ek din

ye haqiqat hai koi KHwab nahin

tere bab-e-qubul par yarab

arz meri hi mustajab nahin

kaam ye la jawab karte ho

mere KHat ka koi jawab nahin

mere jurmon ka kuchh hisab to hai

tere hi rahm ka hisab nahin

kya karun teri did ki hasrat

jab mujhe dekhne ki tab nahin

dekh gahri nazar se dariya ko

koi aisi khuli kitab nahin

tujh se bekas hain saikDon 'nadir'

zer-e-gardun tu hi KHarab nahin