zindagi apni yahan apne liye tazir hai

zindagī apnī yahāñ apne liye ta.azīr hai

shauq dil meñ raqs kā aur paañv meñ zanjīr hai

tesha-e-jamhūriyat hai ahl-e-zar ke haath meñ

jū-e-ḳhūñ ko vo batāte haiñ ki jū-e-shīr hai

gardish-e-ayyām ko ab gardish-e-insāñ kaheñ

karte rahnā hijrateñ insān kī taqdīr hai

jaan dī kitne sitāroñ ne isī ummīd par

sub.h ke hone meñ āḳhir kis liye tāḳhīr hai

jagmagāte qasr ke nīche añdhere jhoñpaḌe

ye hazāroñ saal kī tahzīb kī tasvīr hai

ḳhūñ-bahā merā mire qātil ko miltā hai yahāñ

ban ga.ī insāf kī mīzān bhī shamshīr hai

hoñ khaḌe sone kī īñToñ par rasā.ī ke liye

haath se ūñchī bahut ab adl kī zanjīr hai

ban chukīñ tārīkiyāñ apnā muqaddar is tarah

ek jugnū kī chamak bhī ḳhvāb kī ta.abīr hai

apnā haq apnī zabāñ par bhī nahīñ baaqī rahā

ḳhvāb-e-āzādī kī apne kyā yahī ta.abīr hai

chauñk paḌtā huuñ maiñ har aahaT pe kaise ḳhauf se

aa rahā qātil mirā yā jā rahā rah-gīr hai

bhuuk bīmārī jahālat meñ muqayyad aadmī

zindagī kyā hai koī bigḌī huī tasvīr hai

aadmī hai paikar-e-mehr-o-vafā amn-o-amāñ

har galī-kūche meñ lekin chal rahī shamshīr hai

jābir-o-āmir badal paa.e zamāna kab yahāñ

aam insānoñ se bantī vaqt kī taqdīr hai

zindagi apni yahan apne liye tazir hai

shauq dil mein raqs ka aur panw mein zanjir hai

tesha-e-jamhuriyat hai ahl-e-zar ke hath mein

ju-e-KHun ko wo batate hain ki ju-e-shir hai

gardish-e-ayyam ko ab gardish-e-insan kahen

karte rahna hijraten insan ki taqdir hai

jaan di kitne sitaron ne isi ummid par

subh ke hone mein aaKHir kis liye taKHir hai

jagmagate qasr ke niche andhere jhonpaDe

ye hazaron sal ki tahzib ki taswir hai

KHun-baha mera mere qatil ko milta hai yahan

ban gai insaf ki mizan bhi shamshir hai

hon khaDe sone ki inTon par rasai ke liye

hath se unchi bahut ab adl ki zanjir hai

ban chukin tarikiyan apna muqaddar is tarah

ek jugnu ki chamak bhi KHwab ki tabir hai

apna haq apni zaban par bhi nahin baqi raha

KHwab-e-azadi ki apne kya yahi tabir hai

chaunk paDta hun main har aahaT pe kaise KHauf se

aa raha qatil mera ya ja raha rah-gir hai

bhuk bimari jahaalat mein muqayyad aadmi

zindagi kya hai koi bigDi hui taswir hai

aadmi hai paikar-e-mehr-o-wafa amn-o-aman

har gali-kuche mein lekin chal rahi shamshir hai

jabir-o-amir badal pae zamana kab yahan

aam insanon se banti waqt ki taqdir hai