zindagi-baKHsh samar shaKH mein kam aate hain

zindagī-baḳhsh samar shāḳh meñ kam aate haiñ

ab ke mausam meñ jo aate haiñ to ġham aate haiñ

dīn-o-īmāñ se ġharaz hai na rivāyāt kā paas

tel kī khoj meñ europe ke sanam aate haiñ

dil kī vahshat na ga.ī zaḳhm kā Tāñkā na khulā

us kī mahfil se bhī bā-dīda-e-nam aate haiñ

bā-ḳhabar ai chaman-e-hind ke ḳhush-rang tuyūr

dāna-o-dām liye ahl-e-karam aate haiñ

shab-gazīdoñ se koī jā ke kaho mat ghabrā.eñ

parcham-e-sub.h uThā.e hue ham aate haiñ

kis gharāne se ta.alluq hai ham ahl-e-dil kā

ḳhair-maqdam ke liye dair-o-haram aate haiñ

jab se bāzār meñ bikne lage fankār 'niyāz'

mujh se arbāb-e-qalam shahr meñ kam aate haiñ

zindagi-baKHsh samar shaKH mein kam aate hain

ab ke mausam mein jo aate hain to gham aate hain

din-o-iman se gharaz hai na riwayat ka pas

tel ki khoj mein europe ke sanam aate hain

dil ki wahshat na gai zaKHm ka Tanka na khula

us ki mahfil se bhi ba-dida-e-nam aate hain

ba-KHabar ai chaman-e-hind ke KHush-rang tuyur

dana-o-dam liye ahl-e-karam aate hain

shab-gazidon se koi ja ke kaho mat ghabraen

parcham-e-subh uThae hue hum aate hain

kis gharane se talluq hai hum ahl-e-dil ka

KHair-maqdam ke liye dair-o-haram aate hain

jab se bazar mein bikne lage fankar 'niyaz'

mujh se arbab-e-qalam shahr mein kam aate hain