zindagi chaal chal gai shayad

zindagī chaal chal ga.ī shāyad

maut phir aa ke Tal ga.ī shāyad

khā rahā huuñ abhī fareb-e-vafā

aarzū phir bahal ga.ī shāyad

phir na uTThī girī jo ḳhirman par

barq bhī saath jal ga.ī shāyad

joshish-e-‘ishq kyā kiyā tū ne

baat un kī nikal ga.ī shāyad

hans rahā huuñ firāq-e-dā.im par

ġham kī sūrat badal ga.ī shāyad

un ke ruḳh se nazar nahīñ haTtī

naujavānī machal ga.ī shāyad

tez itnī na thī sharāb-e-husn

dil ke sāñche meñ Dhal ga.ī shāyad

phir uThā sail-e-iztirāb 'nazar'

phir tabī'at sañbhal ga.ī shāyad

zindagi chaal chal gai shayad

maut phir aa ke Tal gai shayad

kha raha hun abhi fareb-e-wafa

aarzu phir bahal gai shayad

phir na uTThi giri jo KHirman par

barq bhi sath jal gai shayad

joshish-e-‘ishq kya kiya tu ne

baat un ki nikal gai shayad

hans raha hun firaq-e-daim par

gham ki surat badal gai shayad

un ke ruKH se nazar nahin haTti

naujawani machal gai shayad

tez itni na thi sharab-e-husn

dil ke sanche mein Dhal gai shayad

phir uTha sail-e-iztirab 'nazar'

phir tabi'at sanbhal gai shayad