zindagi chain se basar na hui

zindagī chain se basar na huī

kabhī qismat hī bahra-var na huī

zindagī besh-o-kam magar na huī

ek pal bhī idhar udhar na huī

sarkashoñ ko yahāñ faroġh kahāñ

zulm kī shāḳh bārvar na huī

naala apnā koī rasā na huā

koī bhī aah pur-asar na huī

dekhiye roz-e-hashr kyā hogā

afv apnī ḳhatā agar na huī

jis jagah hai nihāñ vo parda-nashīñ

haif us jā mirī nazar na huī

āmad-e-marg sun ke hañstā huuñ

ek din merī aañkh tar na huī

ho ga.e ḳhud siyāh baal safed

shaam ke baad kab sahar na huī

kyā jalā koī us kī mahfil meñ

uud kī tarah bū agar na huī

kyā ḳhabar ham kahāñ hue barbād

kuchh hamārī hameñ ḳhabar na huī

isī hasrat meñ ho ga.e mādūm

haath apnā tirī kamar na huī

ai shab-e-vasl haif terī tarah

zindagī apnī muḳhtasar na huī

umr bhar dil ko iztirāb rahā

kabhī kam sozish-e-jigar na huī

shab-e-hijrāñ tirā ho muñh kaalā

mar ga.e ham magar sahar na huī

is tarah 'sabr' le ga.e vo dil

ki jigar ko bhī kuchh ḳhabar na huī

zindagi chain se basar na hui

kabhi qismat hi bahra-war na hui

zindagi besh-o-kam magar na hui

ek pal bhi idhar udhar na hui

sarkashon ko yahan farogh kahan

zulm ki shaKH barwar na hui

nala apna koi rasa na hua

koi bhi aah pur-asar na hui

dekhiye roz-e-hashr kya hoga

afw apni KHata agar na hui

jis jagah hai nihan wo parda-nashin

haif us ja meri nazar na hui

aamad-e-marg sun ke hansta hun

ek din meri aankh tar na hui

ho gae KHud siyah baal safed

sham ke baad kab sahar na hui

kya jala koi us ki mahfil mein

ud ki tarah bu agar na hui

kya KHabar hum kahan hue barbaad

kuchh hamari hamein KHabar na hui

isi hasrat mein ho gae madum

hath apna teri kamar na hui

ai shab-e-wasl haif teri tarah

zindagi apni muKHtasar na hui

umr bhar dil ko iztirab raha

kabhi kam sozish-e-jigar na hui

shab-e-hijran tera ho munh kala

mar gae hum magar sahar na hui

is tarah 'sabr' le gae wo dil

ki jigar ko bhi kuchh KHabar na hui