zindagi chhoD gai be-sar-o-saman mujhe

zindagī chhoḌ ga.ī be-sar-o-sāmān mujhe

umr-bhar yaad rahā aap kā ehsān mujhe

be-hikāyat mire ehsās kī tasvīr magar

har zamāne kā banā.e koī unvān mujhe

qat.a kar de jo zamāne se ta.alluq merā

baḳhsh de is ġham-e-hastī kā tū irfān mujhe

log dekheñge tujhe shahr meñ charchā hogā

ġhaur se dekh mirī samt na pahchān mujhe

dard kī lahar uThī maiñ ne sambhālā dil ko

kar diyā hai mirī nazroñ ne pashemān mujhe

na koī naqsh-e-qadam hai na koī gard-e-safar

duur tak raah nazar aa.ī hai sunsān mujhe

dil ne phir un se na milne kī qasam khaa.ī hai

dekh leñ vo na kisī vaqt pareshān mujhe

maiñ ne joḌā ġham-e-jānāñ se ta.alluq 'anjum'

jab dikhā.ī na diyā aish kā imkān mujhe

zindagi chhoD gai be-sar-o-saman mujhe

umr-bhar yaad raha aap ka ehsan mujhe

be-hikayat mere ehsas ki taswir magar

har zamane ka banae koi unwan mujhe

qata kar de jo zamane se talluq mera

baKHsh de is gham-e-hasti ka tu irfan mujhe

log dekhenge tujhe shahr mein charcha hoga

ghaur se dekh meri samt na pahchan mujhe

dard ki lahar uThi main ne sambhaala dil ko

kar diya hai meri nazron ne pasheman mujhe

na koi naqsh-e-qadam hai na koi gard-e-safar

dur tak rah nazar aai hai sunsan mujhe

dil ne phir un se na milne ki qasam khai hai

dekh len wo na kisi waqt pareshan mujhe

main ne joDa gham-e-jaanan se talluq 'anjum'

jab dikhai na diya aish ka imkan mujhe