zindagi fart-e-hadsat se hai

zindagī fart-e-hādsāt se hai

maut āsā.ish-e-hayāt se hai

shām-e-zulmat hai muft meñ badnām

ābrū-e-sahar to raat se hai

be-ruḳhī meñ hai kaif-e-sarshārī

tishnagī lutf-e-iltifāt se hai

zauq-e-ārā.ish-e-jamāl se duur

sādgī husn kī sifāt se hai

maiñ na hotā to baat hī kyā thī

baat lekin jo kā.enāt se hai

qurb-e-jānāñ se ḳhauf khātā huuñ

pyaar tark-e-ta.alluqāt se hai

ret ke Dher par likhā hai naam

ye amal jaise bāqiyāt se hai

hādse aag bijliyāñ āñdhī

jo bhī aafat hai merī zaat se hai

kitne dariyā the maujzan us meñ

tishna-lab jo lab-e-furāt se hai

nazm-o-qat'āt bhī 'kalīm' haiñ ḳhuub

kaif ġhazloñ kī vārdāt se hai

zindagi fart-e-hadsat se hai

maut aasaish-e-hayat se hai

sham-e-zulmat hai muft mein badnam

aabru-e-sahar to raat se hai

be-ruKHi mein hai kaif-e-sarshaari

tishnagi lutf-e-iltifat se hai

zauq-e-araish-e-jamal se dur

sadgi husn ki sifat se hai

main na hota to baat hi kya thi

baat lekin jo kaenat se hai

qurb-e-jaanan se KHauf khata hun

pyar tark-e-talluqat se hai

ret ke Dher par likha hai nam

ye amal jaise baqiyat se hai

hadse aag bijliyan aandhi

jo bhi aafat hai meri zat se hai

kitne dariya the maujzan us mein

tishna-lab jo lab-e-furaat se hai

nazm-o-qat'at bhi 'kalim' hain KHub

kaif ghazlon ki wardat se hai