zindagi itni be-maza kyun hai

zindagī itnī be-maza kyuuñ hai

dard-o-ġham se ye āshnā kyuuñ hai

is zamāne ke saath saath huuñ maiñ

phir muḳhālif mire havā kyuuñ hai

chāragar bhī na kar sake tashḳhīs

ishq kā dil ko āriza kyuuñ hai

shahr meñ ghar to aur bhī the magar

ik hamārā hī ghar jalā kyuuñ hai

jab vo shah-rag ke hai qarīb to phir

merī nazroñ se vo chhupā kyuuñ hai

ham abhī muttahid hue bhī nahīñ

saare aalam meñ tahlka kyuuñ hai

us ke ġham meñ pata chalā ro kar

qatra-e-ashk be-bahā kyuuñ hai

sakte meñ kufr aaj bhī hai 'vaqār'

rahnumā haq kī karbalā kyuuñ hai

zindagi itni be-maza kyun hai

dard-o-gham se ye aashna kyun hai

is zamane ke sath sath hun main

phir muKHalif mere hawa kyun hai

chaaragar bhi na kar sake tashKHis

ishq ka dil ko aariza kyun hai

shahr mein ghar to aur bhi the magar

ek hamara hi ghar jala kyun hai

jab wo shah-rag ke hai qarib to phir

meri nazron se wo chhupa kyun hai

hum abhi muttahid hue bhi nahin

sare aalam mein tahlka kyun hai

us ke gham mein pata chala ro kar

qatra-e-ashk be-baha kyun hai

sakte mein kufr aaj bhi hai 'waqar'

rahnuma haq ki karbala kyun hai