zindagi ka hai ye bhi koi Dhang

zindagī kā hai ye bhī koī Dhañg

na koī aarzū na koī umañg

hosh kā tuur yā ḳhirad kā rañg

āshiqī ke liye haiñ donoñ nañg

aql hairāñ hai aur fikr hai dañg

jalva aur vo bhī sar-ba-sar be-rañg

sulh-e-kul ishq kā har ik andāz

husn kī har adā payām-e-jañg

abhī jiite haiñ ahrman-zāde

abhī barpā hai ḳhair-o-shar kī jañg

allāh allāh ye husn kā aalam

phuul jaise khile hoñ rañgā-rañg

qahqahe un ke sāġharoñ kī khanak

muskurāhaT tulū-e-sub.h kā rañg

kitnī rañgīn hai ġhazal terī

bañdh gayā bazm meñ 'jamālī' rañg

zindagi ka hai ye bhi koi Dhang

na koi aarzu na koi umang

hosh ka tur ya KHirad ka rang

aashiqi ke liye hain donon nang

aql hairan hai aur fikr hai dang

jalwa aur wo bhi sar-ba-sar be-rang

sulh-e-kul ishq ka har ek andaz

husn ki har ada payam-e-jang

abhi jite hain ahrman-zade

abhi barpa hai KHair-o-shar ki jang

allah allah ye husn ka aalam

phul jaise khile hon ranga-rang

qahqahe un ke sagharon ki khanak

muskurahaT tulu-e-subh ka rang

kitni rangin hai ghazal teri

bandh gaya bazm mein 'jamali' rang