zindagi ka har nafas mamnun hai tadbir ka

zindagī kā har nafas mamnūn hai tadbīr kā

vā.izo dhokā na do insān ko taqdīr kā

apnī sannā.ī kī tujh ko laaj bhī hai yā nahīñ

ai musavvir dekh rañg uḌne lagā tasvīr kā

aap kyuuñ ghabrā ga.e ye aap ko kyā ho gayā

merī aahoñ se koī rishta nahīñ tāsīr kā

dil se nāzuk shai se kab tak ye harīfāna sulūk

dekh shīsha TuuTā jaatā hai tirī tasvīr kā

har nafas kī āmad-o-shud par ye hotī hai ḳhushī

ek halqa aur bhī kam ho gayā zanjīr kā

farq itnā hai ki tū parde meñ aur maiñ be-hijāb

varna maiñ aks-e-mukammal huuñ tirī tasvīr kā

zindagi ka har nafas mamnun hai tadbir ka

waizo dhoka na do insan ko taqdir ka

apni sannai ki tujh ko laj bhi hai ya nahin

ai musawwir dekh rang uDne laga taswir ka

aap kyun ghabra gae ye aap ko kya ho gaya

meri aahon se koi rishta nahin tasir ka

dil se nazuk shai se kab tak ye harifana suluk

dekh shisha TuTa jata hai teri taswir ka

har nafas ki aamad-o-shud par ye hoti hai KHushi

ek halqa aur bhi kam ho gaya zanjir ka

farq itna hai ki tu parde mein aur main be-hijab

warna main aks-e-mukammal hun teri taswir ka