zindagi kaamyab do baba

zindagī kāmyāb do baabā

yā Takā sā javāb do baabā

ho sake to kabhī masarrat kā

merī āñkhoñ ko ḳhvāb do baabā

ḳhaar se ho na vāsta jis kā

koī aisā gulāb do baabā

ho ke be-parda khāoge nashtar

apne ruḳh ko naqāb do baabā

kis qadr ye anarchy har-sū

ho sake to hisāb do baabā

maiñ haqīqat ko pā ke huuñ ġhamgīñ

ḳhūbsūrat sarāb do baabā

hosh se bhī jo kar de begāna

koī aisī sharāb do baabā

maiñ samundar meñ rah ke tishna huuñ

mujh ko ḳhushiyoñ kā aab do baabā

is sadī ko bhī ab ḳhudā ke liye

ik sunahrā sā baab do baabā

baḳht kī tīrgī sahūñ hañs kar

kam se kam itnī taab do baabā

zor jo toḌ de ta.assub kā

koī aisā nisāb do baabā

zindagi kaamyab do baba

ya Taka sa jawab do baba

ho sake to kabhi masarrat ka

meri aankhon ko KHwab do baba

KHar se ho na wasta jis ka

koi aisa gulab do baba

ho ke be-parda khaoge nashtar

apne ruKH ko naqab do baba

kis qadr ye anarchy har-su

ho sake to hisab do baba

main haqiqat ko pa ke hun ghamgin

KHubsurat sarab do baba

hosh se bhi jo kar de begana

koi aisi sharab do baba

main samundar mein rah ke tishna hun

mujh ko KHushiyon ka aab do baba

is sadi ko bhi ab KHuda ke liye

ek sunahra sa bab do baba

baKHt ki tirgi sahun hans kar

kam se kam itni tab do baba

zor jo toD de tassub ka

koi aisa nisab do baba