zindagi ke har-nafas ko jaan-e-jaan samjha tha main

zindagī ke har-nafas ko jān-e-jāñ samjhā thā maiñ

chand lamhoñ ko hayāt-e-jāvidāñ samjhā thā maiñ

chhūT kar ab qaid-e-rang-o-bū se ye sābit huā

vo qafas thā jis ko apnā āshiyāñ samjhā thā maiñ

merā hī afsāna muzmar nāla-e-bulbul meñ thā

jis ko ġhaflat se hadīs-e-dīgarāñ samjhā thā maiñ

rang-e-ruḳh betābī-e-dil āh-e-sard-o-ashk-e-garm

sab the ye ġhammāz jin ko rāzdāñ samjhā thā maiñ

kyā huā ashk-e-musalsal sard aaheñ kyā huiiñ

ishq ko to kārvāñ-dar-kārvāñ samjhā thā maiñ

zindagi ke har-nafas ko jaan-e-jaan samjha tha main

chand lamhon ko hayat-e-jawidan samjha tha main

chhuT kar ab qaid-e-rang-o-bu se ye sabit hua

wo qafas tha jis ko apna aashiyan samjha tha main

mera hi afsana muzmar nala-e-bulbul mein tha

jis ko ghaflat se hadis-e-digaran samjha tha main

rang-e-ruKH betabi-e-dil aah-e-sard-o-ashk-e-garm

sab the ye ghammaz jin ko raazdan samjha tha main

kya hua ashk-e-musalsal sard aahen kya huin

ishq ko to karwan-dar-karwan samjha tha main