zindagi ki kaifiyat ab ye hai KHas-o-am ki

zindagī kī kaifiyat ab ye hai ḳhās-o-ām kī

sub.h ko hotī hai jo hālat charāġh-e-shām kī

khā rahe haiñ roTiyāñ jo chain se ārām kī

likh rahe haiñ kaifiyat vo gardish-e-ayyām kī

jis meñ sab nange haiñ jo nangā nahīñ vo bhī shumār

aur yahī ik ḳhāsiyat hai apne is hammām kī

chehra-e-hālāt ko achchhī tarah paḌh aur phir

aaj kī duniyā batā rāvan kī hai ki raam kī

āshtī āhistagī zinda-dilī uftādgī

zindagī meñ gar nahīñ to zindagī kis kaam kī

falsafe aur falsafoñ kā hal sabhī mil jā.egā

baiTh fursat se rubā.iyāt paḌh ḳhayyām kī

kis tajassus meñ 'sa.ādat' aur kis tahqīq meñ

sub.h apnī dopahar kī dopahar kī shaam kī

zindagi ki kaifiyat ab ye hai KHas-o-am ki

subh ko hoti hai jo haalat charagh-e-sham ki

kha rahe hain roTiyan jo chain se aaram ki

likh rahe hain kaifiyat wo gardish-e-ayyam ki

jis mein sab nange hain jo nanga nahin wo bhi shumar

aur yahi ek KHasiyat hai apne is hammam ki

chehra-e-haalat ko achchhi tarah paDh aur phir

aaj ki duniya bata rawan ki hai ki ram ki

aashti aahistagi zinda-dili uftadgi

zindagi mein gar nahin to zindagi kis kaam ki

falsafe aur falsafon ka hal sabhi mil jaega

baiTh fursat se rubaiyat paDh KHayyam ki

kis tajassus mein 'saadat' aur kis tahqiq mein

subh apni dopahar ki dopahar ki sham ki