zindagi ko na-muradi se koi shikwa nahin

zindagī ko nā-murādī se koī shikva nahīñ

ab agar patthar se Takrā.ūñ to sar phahTtā nahīñ

pī rahī hai qatra qatra mere ḳhvāboñ kā lahū

maiñ huuñ duniyā ke liye mere liye duniyā nahīñ

miT chuke haiñ dil se yuuñ hālāt ke dhuñdle nuqūsh

jis tarah guzrā huā lamha kabhī aatā nahīñ

bhuuk khetoñ meñ khaḌī hai jeb meñ mahñgā.ī-band

shahr aur bāzār meñ gallā kahīñ miltā nahīñ

apne pahlū meñ sameTe ho ġham-e-hastī kā nuur

aisā koī falsafa insān ko miltā nahīñ

koī paiġhām-e-tamannā koī paiġhām-e-amal

sirf kah dene se to duniyā meñ kuchh hotā nahīñ

koī ro.e yā hañse 'parvāz' mujh ko ġham nahīñ

maiñ to zinda huuñ mirā ehsās-e-dil zinda nahīñ

zindagi ko na-muradi se koi shikwa nahin

ab agar patthar se Takraun to sar phahTta nahin

pi rahi hai qatra qatra mere KHwabon ka lahu

main hun duniya ke liye mere liye duniya nahin

miT chuke hain dil se yun haalat ke dhundle nuqush

jis tarah guzra hua lamha kabhi aata nahin

bhuk kheton mein khaDi hai jeb mein mahngai-band

shahr aur bazar mein galla kahin milta nahin

apne pahlu mein sameTe ho gham-e-hasti ka nur

aisa koi falsafa insan ko milta nahin

koi paigham-e-tamanna koi paigham-e-amal

sirf kah dene se to duniya mein kuchh hota nahin

koi roe ya hanse 'parwaz' mujh ko gham nahin

main to zinda hun mera ehsas-e-dil zinda nahin