zindagi kya hai wafa kya hai aqidat kya hai

zindagī kyā hai vafā kyā hai aqīdat kyā hai

ham batāte haiñ ḳhudāoñ kī haqīqat kyā hai

maiñ ne pūchhā hai sitāroñ se siyah rātoñ meñ

kaun hai kū-e-gunah rāh-e-tarīqat kyā hai

maiñ ne hālāt kī har aag meñ jal kar jaanā

rāhat-e-qalb hai kyā aur musībat kyā hai

Tok detā hai bhale koī ġhalat ho ki sahī

nāsehā ye to batā farz-e-nasīhat kyā hai

chāñd sūraj ko sitāroñ ko parakhne vaalo

tum ko ma.alūm bhī hai chashm-e-basīrat kyā hai

kitne anjān haiñ insān samajh baiThe haiñ

ḳhūbsūrat ho bashar phir to ye sīrat kyā hai

kis qadar duur 'harī' kesh chale aa.e ho

qadr thī des meñ pardes meñ qīmat kyā hai

zindagi kya hai wafa kya hai aqidat kya hai

hum batate hain KHudaon ki haqiqat kya hai

main ne puchha hai sitaron se siyah raaton mein

kaun hai ku-e-gunah rah-e-tariqat kya hai

main ne haalat ki har aag mein jal kar jaana

rahat-e-qalb hai kya aur musibat kya hai

Tok deta hai bhale koi ghalat ho ki sahi

naseha ye to bata farz-e-nasihat kya hai

chand suraj ko sitaron ko parakhne walo

tum ko malum bhi hai chashm-e-basirat kya hai

kitne anjaan hain insan samajh baiThe hain

KHubsurat ho bashar phir to ye sirat kya hai

kis qadar dur 'hari' kesh chale aae ho

qadr thi des mein pardes mein qimat kya hai