zindagi mein KHushi nahin aai

zindagī meñ ḳhushī nahīñ aa.ī

ye sabā is galī nahīñ aa.ī

aap ko nazm kar nahīñ paayā

haañ mujhe shā.irī nahīñ aa.ī

baat kahne kā Dhañg soch liyā

baat kahnī kabhī nahīñ aa.ī

bus ko roke hue the dost mire

aur vo bāvrī nahīñ aa.ī

log sadiyoñ ke dard kaaT ga.e

par shab-e-āḳhirī nahīñ aa.ī

hosh meñ ghūmte ho saḌkoñ par

tum ko āvārgī nahīñ aa.ī

ek marhūm kī tarah vāpas

umr guzrī huī nahīñ aa.ī

choT āvāz se lagī aur phir

hosh meñ ḳhāmushī nahīñ aa.ī

zindagi mein KHushi nahin aai

ye saba is gali nahin aai

aap ko nazm kar nahin paya

han mujhe shairi nahin aai

baat kahne ka Dhang soch liya

baat kahni kabhi nahin aai

bus ko roke hue the dost mere

aur wo bawri nahin aai

log sadiyon ke dard kaT gae

par shab-e-aKHiri nahin aai

hosh mein ghumte ho saDkon par

tum ko aawargi nahin aai

ek marhum ki tarah wapas

umr guzri hui nahin aai

choT aawaz se lagi aur phir

hosh mein KHamushi nahin aai