zindagi motiyon ki Dhalakti laDi zindagi rang-e-gul ka bayan dosto

zindagī motiyoñ kī Dhalaktī laḌī zindagī rañg-e-gul kā bayāñ dosto

gaah rotī huī gaah hañstī huī merī āñkheñ haiñ afsāna-ḳhvāñ dosto

hai usī ke jamāl-e-nazar kā asar zindagī zindagī hai safar hai safar

sāya-e-shāḳh-e-gul shāḳh-e-gul ban gayā ban gayā abr abr-e-ravāñ dosto

ik mahaktī bahaktī huī raat hai laḌkhaḌātī nigāhoñ kī sauġhāt hai

pankhuḌī kī zabāñ phuul kī dāstāñ us ke hoñToñ kī parchhā.iyāñ dosto

kaise tai hogī ye manzil-e-shām-e-ġham kis tarah se ho dil kī kahānī raqam

ik hathelī meñ dil ik hathelī meñ jaañ ab kahāñ kā ye sūd-o-ziyāñ dosto

dosto ek do jaam kī baat hai dosto ek do gaam kī baat hai

haañ usī ke dar-o-bām kī baat hai baḌh na jaa.eñ kahīñ dūriyāñ dosto

sun rahā huuñ havādis kī āvāz ko pā rahā huuñ zamāne ke har raaz ko

dosto uTh rahā hai diloñ se dhuāñ aañkh lene lagī hichkiyāñ dosto

zindagi motiyon ki Dhalakti laDi zindagi rang-e-gul ka bayan dosto

gah roti hui gah hansti hui meri aankhen hain afsana-KHwan dosto

hai usi ke jamal-e-nazar ka asar zindagi zindagi hai safar hai safar

saya-e-shaKH-e-gul shaKH-e-gul ban gaya ban gaya abr abr-e-rawan dosto

ek mahakti bahakti hui raat hai laDkhaDati nigahon ki saughat hai

pankhuDi ki zaban phul ki dastan us ke honTon ki parchhaiyan dosto

kaise tai hogi ye manzil-e-sham-e-gham kis tarah se ho dil ki kahani raqam

ek hatheli mein dil ek hatheli mein jaan ab kahan ka ye sud-o-ziyan dosto

dosto ek do jam ki baat hai dosto ek do gam ki baat hai

han usi ke dar-o-baam ki baat hai baDh na jaen kahin duriyan dosto

sun raha hun hawadis ki aawaz ko pa raha hun zamane ke har raaz ko

dosto uTh raha hai dilon se dhuan aankh lene lagi hichkiyan dosto