zindagi ne fasl-e-gul ko bhi pasheman kar diya

zindagī ne fasl-e-gul ko bhī pashemāñ kar diyā

jis bayābāñ par nazar Daalī gulistāñ kar diyā

tū ne ye kyā ai sukūt-e-shikva-sāmāñ kar diyā

dil kī dil hī meñ rahī un ko pashemāñ kar diyā

shukriya ai mausam-e-gul pās-e-vahshat hai yahī

gulsitāñ ko tū ne ham-dīvār-e-zindāñ kar diyā

kitne afsāne banā kar rakh liye the shauq ne

yuuñ naqāb ulTī haqīqat ne ki hairāñ kar diyā

kis qadar mazbūt nikle tere dīvāne ke haath

shām-e-ġham ko jab nichoḌā sub.h-e-tābāñ kar diyā

phuul barsā.e haiñ kyā kyā teġh-e-ḳhūñ-āshām ne

tum ne shahar-e-gul-azārāñ ko gulistāñ kar diyā

sīna-e-san.at meñ bhar kar apne dil kā iztirāb

āhan-o-faulād ko maiñ ne ġhazal-ḳhvāñ kar diyā

zindagi ne fasl-e-gul ko bhi pasheman kar diya

jis bayaban par nazar Dali gulistan kar diya

tu ne ye kya ai sukut-e-shikwa-saman kar diya

dil ki dil hi mein rahi un ko pasheman kar diya

shukriya ai mausam-e-gul pas-e-wahshat hai yahi

gulsitan ko tu ne ham-diwar-e-zindan kar diya

kitne afsane bana kar rakh liye the shauq ne

yun naqab ulTi haqiqat ne ki hairan kar diya

kis qadar mazbut nikle tere diwane ke hath

sham-e-gham ko jab nichoDa subh-e-taban kar diya

phul barsae hain kya kya tegh-e-KHun-asham ne

tum ne shahar-e-gul-azaran ko gulistan kar diya

sina-e-sanat mein bhar kar apne dil ka iztirab

aahan-o-faulad ko main ne ghazal-KHwan kar diya