zindagi ne jo hamein di thi ghuTan bhul gae

zindagī ne jo hameñ dī thī ghuTan bhuul ga.e

us kī āñkhoñ meñ jo dekhā to thakan bhuul ga.e

aise beToñ se bhalā kaun karegā ummīd

jā ke pardes meñ jo apnā vatan bhuul ga.e

kal jo chalte the zamīnoñ pe akaḌ kar itnā

muflisī meñ vo ab andar kī patan bhuul ga.e

kāġhazī vā'doñ ke kuchh haar gale meñ jo paḌe

ham ġhulāmī ke sabhī tauq-o-rasan bhuul ga.e

is na.e daur ke hālāt kī sangīnī se

jo ubhar aa.ī thī māthe pe shikan bhuul ga.e

un kī chhoḌo vo jo karte haiñ unheñ karne do

aap kyoñ apnī mohabbat kā chalan bhuul ga.e

apne ash'ār sunā kar chale jaate haiñ 'sabā'

rasm-e-ādāb bhī ab ahl-e-suḳhan bhuul ga.e

zindagi ne jo hamein di thi ghuTan bhul gae

us ki aankhon mein jo dekha to thakan bhul gae

aise beTon se bhala kaun karega ummid

ja ke pardes mein jo apna watan bhul gae

kal jo chalte the zaminon pe akaD kar itna

muflisi mein wo ab andar ki patan bhul gae

kaghazi wa'don ke kuchh haar gale mein jo paDe

hum ghulami ke sabhi tauq-o-rasan bhul gae

is nae daur ke haalat ki sangini se

jo ubhar aai thi mathe pe shikan bhul gae

un ki chhoDo wo jo karte hain unhen karne do

aap kyon apni mohabbat ka chalan bhul gae

apne ash'ar suna kar chale jate hain 'saba'

rasm-e-adab bhi ab ahl-e-suKHan bhul gae