zindagi paemal karte ho

zindagī pā.emāl karte ho

banda-parvar kamāl karte ho

zulm hai jor hai jafā.eñ haiñ

kis se kasb-e-kamāl karte ho

hijr denā mizāj hai un se

kyoñ savāl-e-visāl karte ho

vasl do-chār sā.atoñ ke liye

hijr meñ māh-o-sāl karte ho

ek hī dil thā de diyā tum ko

kis liye ab vabāl karte ho

vasl hai ek jis kī ḳhātir tum

jaane kitne savāl karte ho

jaan lenī hai jaan le lenā

is meñ kyā qīl-o-qāl karte ho

dard dete ho ranj dete ho

merā kitnā ḳhayāl karte ho

tum ko un se vafā kī hai ummīd

'raaj sāhab kamāl karte ho

zindagi paemal karte ho

banda-parwar kamal karte ho

zulm hai jor hai jafaen hain

kis se kasb-e-kamal karte ho

hijr dena mizaj hai un se

kyon sawal-e-visal karte ho

wasl do-chaar saaton ke liye

hijr mein mah-o-sal karte ho

ek hi dil tha de diya tum ko

kis liye ab wabaal karte ho

wasl hai ek jis ki KHatir tum

jaane kitne sawal karte ho

jaan leni hai jaan le lena

is mein kya qil-o-qal karte ho

dard dete ho ranj dete ho

mera kitna KHayal karte ho

tum ko un se wafa ki hai ummid

'raj sahab kamal karte ho