zindagi rah-e-wafa mein jo miTa dete hain

zindagī rāh-e-vafā meñ jo miTā dete haiñ

naqsh ulfat kā vo duniyā meñ jamā dete haiñ

is tarah jurm-e-mohabbat kī sazā dete haiñ

vo jise apnā samajhte haiñ miTā dete haiñ

ek jul roz hameñ aap nayā dete haiñ

va.ada-e-vasl ko bātoñ meñ uḌā dete haiñ

ḳhum-o-mīnā-o-subū bazm meñ aate aate

apnī āñkhoñ se ka.ī jaam pilā dete haiñ

husn kā koī judā to nahīñ hotā andāz

'ishq vaale unheñ andāz sikhā dete haiñ

kosne dete haiñ jis vaqt butān-e-tannāz

haath uThā.e hue ham un ko du'ā dete haiñ

mere ḳhvāboñ meñ bhī aate haiñ 'adū ke hamrāh

ye vafāoñ kā mirī aap sila dete haiñ

hālat-e-ġhair pe yuuñ ḳhair se hañsne vaale

is tavajjoh kī bhī ham tum ko du'ā dete haiñ

shahr meñ roz uḌā kar mire marne kī ḳhabar

jashn vo roz raqīboñ kā manā dete haiñ

dair-o-kā'ba ho kalīsā ho ki mai-ḳhāna ho

sab har ik dar pe tujhī ko to sadā dete haiñ

ishva-o-husn-o-adā par tirī marne vaale

kitne mā'sūm yūñhī 'umr gañvā dete haiñ

pa.e gul-gasht vo gul-posh jo aa.e 'gulzār'

zindagī sabze ke mānind bichhā dete haiñ

zindagi rah-e-wafa mein jo miTa dete hain

naqsh ulfat ka wo duniya mein jama dete hain

is tarah jurm-e-mohabbat ki saza dete hain

wo jise apna samajhte hain miTa dete hain

ek jul roz hamein aap naya dete hain

wada-e-wasl ko baaton mein uDa dete hain

KHum-o-mina-o-subu bazm mein aate aate

apni aankhon se kai jam pila dete hain

husn ka koi juda to nahin hota andaz

'ishq wale unhen andaz sikha dete hain

kosne dete hain jis waqt butan-e-tannaz

hath uThae hue hum un ko du'a dete hain

mere KHwabon mein bhi aate hain 'adu ke hamrah

ye wafaon ka meri aap sila dete hain

haalat-e-ghair pe yun KHair se hansne wale

is tawajjoh ki bhi hum tum ko du'a dete hain

shahr mein roz uDa kar mere marne ki KHabar

jashn wo roz raqibon ka mana dete hain

dair-o-ka'ba ho kalisa ho ki mai-KHana ho

sab har ek dar pe tujhi ko to sada dete hain

ishwa-o-husn-o-ada par teri marne wale

kitne ma'sum yunhi 'umr ganwa dete hain

pae gul-gasht wo gul-posh jo aae 'gulzar'

zindagi sabze ke manind bichha dete hain