zindagi shola-fishan guzri hai

zindagī sho'la-fishāñ guzrī hai

aur sar-e-āb-e-ravāñ guzrī hai

muskurātī huī ik shoḳh kiran

merī jānib nigarāñ guzrī hai

kah rahī hoñ vo nigāheñ jaise

ajnabī raat kahāñ guzrī hai

āḳhir-e-shab vo sitāroñ kī phuvār

shīsha-e-dil pe girāñ guzrī hai

ik lajā.ī huī parchhā.īñ sī

bar-sar-e-rāh-e-gumāñ guzrī hai

haa.e kis ḳhushk zabāñ se patte

kah rahe haiñ ki ḳhizāñ guzrī hai

chāñdnī thī ki tire jism kī aañch

raat kis darja tapāñ guzrī hai

maiñ to āzurda-e-vahshat huuñ magar

tum pe kyā ahl-e-jahāñ guzrī hai

qalb-e-gardūñ se mirī āh-e-rasā

sūrat-e-kāhkashāñ guzrī hai

zindagi sho'la-fishan guzri hai

aur sar-e-ab-e-rawan guzri hai

muskuraati hui ek shoKH kiran

meri jaanib nigaran guzri hai

kah rahi hon wo nigahen jaise

ajnabi raat kahan guzri hai

aaKHir-e-shab wo sitaron ki phuwar

shisha-e-dil pe giran guzri hai

ek lajai hui parchhain si

bar-sar-e-rah-e-guman guzri hai

hae kis KHushk zaban se patte

kah rahe hain ki KHizan guzri hai

chandni thi ki tere jism ki aanch

raat kis darja tapan guzri hai

main to aazurda-e-wahshat hun magar

tum pe kya ahl-e-jahan guzri hai

qalb-e-gardun se meri aah-e-rasa

surat-e-kahkashan guzri hai