zindagi tujhko bhi aur tera tamasha dekhun

zindagī tujh ko bhī aur terā tamāsha dekhūñ

apnī ma.asūm sī āñkhoñ se maiñ kyā kyā dekhūñ

kyā sivā is ke bhalā aur nazāra dekhūñ

raat kī shāḳh pe us chāñd ko baiThā dekhūñ

raqs kartā huā guzrā hai abhī hijr kā dukh

dhuul chhaT jaa.e to aage kā bhī rasta dekhūñ

ek vo din thā ki ik shaḳhs thā duniyā merī

ek ye din hai ki har shaḳhs meñ duniyā dekhūñ

merī niyyat to bahut baar parakh lī us ne

maiñ bhī us shaḳhs kā is baar irāda dekhūñ

vaqt ke saath to ḳhud vaqt badal jaatā hai

so hī ḳhvāhish hai ki maiñ ḳhud ko badaltā dekhūñ

aur tū bol paḌe palkeñ to jhapkāyā karo

sochtā huuñ tirī tasvīr ko itnā dekhūñ

zindagi tujh ko bhi aur tera tamasha dekhun

apni masum si aankhon se main kya kya dekhun

kya siwa is ke bhala aur nazara dekhun

raat ki shaKH pe us chand ko baiTha dekhun

raqs karta hua guzra hai abhi hijr ka dukh

dhul chhaT jae to aage ka bhi rasta dekhun

ek wo din tha ki ek shaKHs tha duniya meri

ek ye din hai ki har shaKHs mein duniya dekhun

meri niyyat to bahut bar parakh li us ne

main bhi us shaKHs ka is bar irada dekhun

waqt ke sath to KHud waqt badal jata hai

so hi KHwahish hai ki main KHud ko badalta dekhun

aur tu bol paDe palken to jhapkaya karo

sochta hun teri taswir ko itna dekhun