zindagi tujhko tere jine ki aadat kha gai

zindagī tujh ko tire jiine kī aadat khā ga.ī

dhuup is bastī kī ye ūñchī imārat khā ga.ī

vaz.a-dārī aur ravā-dārī ke vo jalve kahāñ

zehn-o-dil kī kaj-ravī husn-e-sharāfat khā ga.ī

aap ke alfāz yā bhaḌke hue sho.ale haiñ ye

rishta-e-iḳhlās ko un kī tamāzat khā ga.ī

dekhiye zehnī kudūrat aur ḳhabāsat kā mazāq

ik ibādat-gāh ye gandī siyāsat khā ga.ī

kho ga.iiñ sher-o-suḳhan husn-e-bayāñ kī lazzateñ

saarā husn-e-shā.irī sikkoñ kī chāhat khā ga.ī

dā.ere hirs-o-havas ke jis qadar baḌhte ga.e

ḳhud-farāmoshī baḌhī husn-e-qanā.at khā ga.ī

kitnī hī labrez ho husn-e-ma.ānī se 'tarab'

un ke andāz-e-taḳhātub ko tavālat khā ga.ī

zindagi tujh ko tere jine ki aadat kha gai

dhup is basti ki ye unchi imarat kha gai

waza-dari aur rawa-dari ke wo jalwe kahan

zehn-o-dil ki kaj-rawi husn-e-sharafat kha gai

aap ke alfaz ya bhaDke hue shoale hain ye

rishta-e-iKHlas ko un ki tamazat kha gai

dekhiye zehni kudurat aur KHabasat ka mazaq

ek ibaadat-gah ye gandi siyasat kha gai

kho gain sher-o-suKHan husn-e-bayan ki lazzaten

sara husn-e-shairi sikkon ki chahat kha gai

daere hirs-o-hawas ke jis qadar baDhte gae

KHud-faramoshi baDhi husn-e-qanaat kha gai

kitni hi labrez ho husn-e-maani se 'tarab'

un ke andaz-e-taKHatub ko tawalat kha gai