zindagi uljhi hai bikhre hue gesu ki tarah

zindagī uljhī hai bikhre hue gesū kī tarah

ġham piye jaate haiñ umDe hue aañsū kī tarah

aaj vahshat kā ye aalam hai ki har insāñ hai

dasht-e-tajrīd ke bhāge hue aahū kī tarah

zulm kā aag ugaltā huā sūraj sar par

tapish-e-dard se har saañs hai ab lū kī tarah

hai gulistāñ meñ tirī gul-badanī kā shohrā

kaash tū guzre idhar se kabhī ḳhushbū kī tarah

assī ummīd pe ā.īna-e-dil dhote haiñ

mun.akis ho koī sūrat mire mah-rū kī tarah

shab-e-furqat meñ bhī tanhā.ī mayassar na huī

laakh ġham ghere rahe mujh ko jafā-jū kī tarah

be-dilī shart-e-mulāqāt hai to yuuñ hī sahī

ham tire shahr meñ ab ā.eñge sādhū kī tarah

Dūbne lagtī hai jab rañg ke sailāb meñ aañkh

yaad tab us kī bachā letī hai jaadū kī tarah

sarzanish bhī tirī bantī hai sahārā merā

rāh-e-dushvār meñ phaile hue baazū kī tarah

lazzat-e-dahr meñ gum hotā hai jab dil 'asrā'

tab kasak uThtā hai vo dard ke pahlū kī tarah

zindagi uljhi hai bikhre hue gesu ki tarah

gham piye jate hain umDe hue aansu ki tarah

aaj wahshat ka ye aalam hai ki har insan hai

dasht-e-tajrid ke bhage hue aahu ki tarah

zulm ka aag ugalta hua suraj sar par

tapish-e-dard se har sans hai ab lu ki tarah

hai gulistan mein teri gul-badani ka shohra

kash tu guzre idhar se kabhi KHushbu ki tarah

assi ummid pe aaina-e-dil dhote hain

munakis ho koi surat mere mah-ru ki tarah

shab-e-furqat mein bhi tanhai mayassar na hui

lakh gham ghere rahe mujh ko jafa-ju ki tarah

be-dili shart-e-mulaqat hai to yun hi sahi

hum tere shahr mein ab aaenge sadhu ki tarah

Dubne lagti hai jab rang ke sailab mein aankh

yaad tab us ki bacha leti hai jadu ki tarah

sarzanish bhi teri banti hai sahaara mera

rah-e-dushwar mein phaile hue bazu ki tarah

lazzat-e-dahr mein gum hota hai jab dil 'asra'

tab kasak uThta hai wo dard ke pahlu ki tarah