ziya-e-mehr ke paikar mein Dhaal de mujhko

ziyā-e-mehr ke paikar meñ Dhaal de mujh ko

ubhartī sub.h se koī misāl de mujh ko

mire vujūd pe tanhā.iyāñ musallat haiñ

hisār-e-zāt se bāhar nikāl de mujh ko

rivāyatoñ ke dhuñdalkoñ meñ gum rahūñ kab tak

na.e jahāñ kā achhūtā ḳhayāl de mujh ko

tamām 'umr savāloñ se khelnā hī rahā

jo hal na ho sake aisā savāl de mujh ko

tire hisār-e-karam meñ mirā muqaddar hai

'urūj baḳhsh de chāhe zavāl de mujh ko

mirī chamak se agar ḳhīra haiñ tirī āñkheñ

to tīrgī ke samundar meñ Daal de mujh ko

hazāroñ gauhar-e-nāyāb mujh meñ haiñ 'firdaus'

agar talab hai to aa kar khañgāl de mujh ko

ziya-e-mehr ke paikar mein Dhaal de mujh ko

ubharti subh se koi misal de mujh ko

mere wujud pe tanhaiyan musallat hain

hisar-e-zat se bahar nikal de mujh ko

riwayaton ke dhundalkon mein gum rahun kab tak

nae jahan ka achhuta KHayal de mujh ko

tamam 'umr sawalon se khelna hi raha

jo hal na ho sake aisa sawal de mujh ko

tere hisar-e-karam mein mera muqaddar hai

'uruj baKHsh de chahe zawal de mujh ko

meri chamak se agar KHira hain teri aankhen

to tirgi ke samundar mein Dal de mujh ko

hazaron gauhar-e-nayab mujh mein hain 'firdaus'

agar talab hai to aa kar khangal de mujh ko