zoron pe bahut ab meri aashufta-sari hai

zoroñ pe bahut ab mirī āshufta-sarī hai

ye haal hai ḳhud se bhī mujhe be-ḳhabarī hai

jab se nahīñ āġhosh meñ vo jān-e-tamannā

ik sil hai ki har vaqt kaleje pe dharī hai

un kī jo mayassar nahīñ shādāb-nigāhī

phūloñ meñ koī rañg na sabze meñ tarī hai

maanā ki mohabbat ke haiñ dushvār taqāze

be-yār ke jiinā bhī to ik dard-sarī hai

lapkā hai ye ik umr kā jā.egā na hargiz

is gul se tabī.at na bharegī na bharī hai

ik un kī haqīqat to mire dil ko hai taslīm

baaqī hai jo kaunain meñ vo sab nazarī hai

āñkhoñ meñ samātā nahīñ ab aur jo koī

kyā jaane basīrat hai ki ye be-basarī hai

jāgoge shab-e-ġham meñ 'jalīl' aur kahāñ tak

sote nahīñ kyūñ? niiñd to āñkhoñ meñ bharī hai

zoron pe bahut ab meri aashufta-sari hai

ye haal hai KHud se bhi mujhe be-KHabari hai

jab se nahin aaghosh mein wo jaan-e-tamanna

ek sil hai ki har waqt kaleje pe dhari hai

un ki jo mayassar nahin shadab-nigahi

phulon mein koi rang na sabze mein tari hai

mana ki mohabbat ke hain dushwar taqaze

be-yar ke jina bhi to ek dard-sari hai

lapka hai ye ek umr ka jaega na hargiz

is gul se tabiat na bharegi na bhari hai

ek un ki haqiqat to mere dil ko hai taslim

baqi hai jo kaunain mein wo sab nazari hai

aankhon mein samata nahin ab aur jo koi

kya jaane basirat hai ki ye be-basari hai

jagoge shab-e-gham mein 'jalil' aur kahan tak

sote nahin kyun? nind to aankhon mein bhari hai