zuhur-e-nur se dil aaftab hota hai

zuhūr-e-nūr se dil āftāb hotā hai

visāl-e-qurb se banda ḳhudā nahīñ hotā

ye ham ne maanā ki ik ḳhāk-o-ḳhūñ kā putlā hai

magar vo chāhne vāloñ ko kyā nahīñ hotā

hasīn ḳhuun bahāte haiñ āshiqoñ kā yuuñ

dayār-e-ishq meñ kyā ḳhūñ-bahā nahīñ hotā

to khaTkaTāte haiñ dar bārgāh-e-maulā kā

jab aur koī hameñ aasrā nahīñ hotā

yahāñ to apnī lagan hī kā kul karishma hai

rah-e-ḳhudā meñ koī rahnumā nahīñ hotā

hazāroñ hāfiz-o-ḳhayyām haiñ zamāne meñ

ki be-misāl sivā.e ḳhudā nahīñ hotā

kisī ke kaam na aa.e jo farz adā na kare

vo aur kuchh bhī ho mard-e-ḳhudā nahīñ hotā

agar qubūl kareñ us kī vahdat-e-mutlaq

to jabr-o-qadr koī mas.ala nahīñ hotā

vo shakl badle ki āñkhoñ se ho rahe ojhal

kisī vajūd kā zarra fanā nahīñ hotā

yahīñ kahīñ vo zamān-o-makāñ meñ pinhāñ hai

ki apnī san'a se sān.e.a judā nahīñ hotā

zuhur-e-nur se dil aaftab hota hai

visal-e-qurb se banda KHuda nahin hota

ye hum ne mana ki ek KHak-o-KHun ka putla hai

magar wo chahne walon ko kya nahin hota

hasin KHun bahate hain aashiqon ka yun

dayar-e-ishq mein kya KHun-baha nahin hota

to khaTkaTate hain dar bargah-e-maula ka

jab aur koi hamein aasra nahin hota

yahan to apni lagan hi ka kul karishma hai

rah-e-KHuda mein koi rahnuma nahin hota

hazaron hafiz-o-KHayyam hain zamane mein

ki be-misal siwae KHuda nahin hota

kisi ke kaam na aae jo farz ada na kare

wo aur kuchh bhi ho mard-e-KHuda nahin hota

agar qubul karen us ki wahdat-e-mutlaq

to jabr-o-qadr koi masala nahin hota

wo shakl badle ki aankhon se ho rahe ojhal

kisi wajud ka zarra fana nahin hota

yahin kahin wo zaman-o-makan mein pinhan hai

ki apni san'a se sanea juda nahin hota