zulf agar dil ko phansa rakhti hai

zulf agar dil ko phañsā rakhtī hai

aañkh pardoñ meñ chhupā rakhtī hai

saath fahmīdgī gar hove to phir

but-parastī bhī mazā rakhtī hai

chahchahā rañg mire ḳhuun kā sā

tire paañv kī hinā rakhtī hai

aarsī hotī hai sanmukh tere

kuchh bhī āñkhoñ meñ hayā rakhtī hai

kar diyā us ne to mujh ko mad.hosh

kis kī bū bād-e-sabā rakhtī hai

ḳhāk-e-dehlī kī zarā sair to kar

ki ajab āb-o-havā rakhtī hai

haa.e tīkhī nigah us kāfir kī

kyā kahūñ maiñ jo adā rakhtī hai

terī tasvīr ko le kar shīrīñ

apnī chhātī se lagā rakhtī hai

jab talak aave hai tū phir ke ye chaal

ḳhaak meñ mujh ko milā rakhtī hai

aarsī se na karo kaj-nazarī

is kā tum se vo gilā rakhtī hai

aah merī hai asar se ham-dosh

tāl-e-zulf-e-rasā rakhtī hai

kyā hai taqsīr jo ham ko tujh se

gardish-e-charḳh judā rakhtī hai

jhuk paḌe hai terī pā-bosī kā

zulf bhī shauq-e-balā rakhtī hai

gosht aur post bhī gal jaatā hai

jism ke biich ye kyā rakhtī hai

'mus.hafī' naam hai jis chiiz kā chaah

aadmī ko to khapā rakhtī hai

zulf agar dil ko phansa rakhti hai

aankh pardon mein chhupa rakhti hai

sath fahmidgi gar howe to phir

but-parasti bhi maza rakhti hai

chahchaha rang mere KHun ka sa

tere panw ki hina rakhti hai

aarsi hoti hai sanmukh tere

kuchh bhi aankhon mein haya rakhti hai

kar diya us ne to mujh ko madhosh

kis ki bu baad-e-saba rakhti hai

KHak-e-dehli ki zara sair to kar

ki ajab aab-o-hawa rakhti hai

hae tikhi nigah us kafir ki

kya kahun main jo ada rakhti hai

teri taswir ko le kar shirin

apni chhati se laga rakhti hai

jab talak aawe hai tu phir ke ye chaal

KHak mein mujh ko mila rakhti hai

aarsi se na karo kaj-nazari

is ka tum se wo gila rakhti hai

aah meri hai asar se ham-dosh

tal-e-zulf-e-rasa rakhti hai

kya hai taqsir jo hum ko tujh se

gardish-e-charKH juda rakhti hai

jhuk paDe hai teri pa-bosi ka

zulf bhi shauq-e-bala rakhti hai

gosht aur post bhi gal jata hai

jism ke bich ye kya rakhti hai

'mushafi' nam hai jis chiz ka chah

aadmi ko to khapa rakhti hai