zulf andher karne wali hai

zulf andher karne vaalī hai

tum ne nāgan balā kī paalī hai

qalameñ ruḳhsār-e-yār par dekho

surḳh hai phuul sabz Daalī hai

ġhair par lutf hai sitam ham par

un kī jo baat hai nirālī hai

vaah kyā muñh se phuul jhaḌte haiñ

kitnī pyārī tumhārī gaalī hai

murġh-e-dil bhī hai saath chiḌiyā ke

jaal añgiyā kī un kī jaalī hai

shab-e-furqat ko dekh baḳht-e-siyāh

koī bhī raat itnī kaalī hai

kyuuñ qayāmat kī chaal chaltī ho

is meñ āshiq kī pā.emālī hai

dahan-e-yār kā patā na lagā

baat kahne ko ik banā lī hai

nāf-e-ma.ashūq saaf motī kī

nannhī-munnī sī ik pyālī hai

kyūñkar un ko duuñ mehr-o-mah se misāl

jin ko da.avā-e-be-misālī hai

rañg laa.ī gilauriyāñ kah kar

laal hoñThoñ pe aur laalī hai

dil tasavvur meñ mahv rahtā hai

āshiq-e-shāhid-e-ḳhayālī hai

kyuuñ hañsā.e na mujh se riñd ko bañg

duḳht-e-raz kī bahan hai saalī hai

dam ġhanīmat hai us masīhā kā

ab tabīboñ se shahr ḳhālī hai

ḳhaak uḌaa.ī hai un ke kūche kī

ham ne sar par zamīñ uThā lī hai

dil mirā le ke arsh par hai dimāġh

aur hī ab mizāj-e-ālī hai

kyuuñ butoñ kī hameñ mohabbat dī

kyā musībat ḳhudā ne Daalī hai

vaañ kabhī ġhair se kabhī ham haiñ

roz mauqūfī aur bahālī hai

de ke ik bosa-e-lab-e-jāñ-baḳhsh

tan-e-be-jāñ meñ jaan Daalī hai

kyā balā gorī gorī rañgat par

zulf kaalī hai aañkh kaalī hai

haal meñ shā.irī kā hai ye Dhañg

apnā jo sher hai vo haalī hai

dekho mujh par bahut sitam na karo

paas ai jaan kotavālī hai

ham se inkār vasl kā hai abas

hogī jo baat hone vaalī hai

un ke kūche meñ ḳhaak ho jaa.eñ

ham ne ik raah ye nikālī hai

yaar pahlū meñ hai na jām-e-sharāb

ye bhī ḳhālī hai vo bhī ḳhālī hai

hai sitam ye anīle-pan kā banāo

kaan meñ ek ek baalī hai

us ke maz.hab kā e.atibār hai kyā

'mehr' ik rind-e-lā-ubālī hai

zulf andher karne wali hai

tum ne nagan bala ki pali hai

qalamen ruKHsar-e-yar par dekho

surKH hai phul sabz Dali hai

ghair par lutf hai sitam hum par

un ki jo baat hai nirali hai

wah kya munh se phul jhaDte hain

kitni pyari tumhaari gali hai

murgh-e-dil bhi hai sath chiDiya ke

jal angiya ki un ki jali hai

shab-e-furqat ko dekh baKHt-e-siyah

koi bhi raat itni kali hai

kyun qayamat ki chaal chalti ho

is mein aashiq ki paemali hai

dahan-e-yar ka pata na laga

baat kahne ko ek bana li hai

naf-e-mashuq saf moti ki

nannhi-munni si ek pyali hai

kyunkar un ko dun mehr-o-mah se misal

jin ko dawa-e-be-misali hai

rang lai gilauriyan kah kar

lal honThon pe aur lali hai

dil tasawwur mein mahw rahta hai

aashiq-e-shahid-e-KHayali hai

kyun hansae na mujh se rind ko bang

duKHt-e-raz ki bahan hai sali hai

dam ghanimat hai us masiha ka

ab tabibon se shahr KHali hai

KHak uDai hai un ke kuche ki

hum ne sar par zamin uTha li hai

dil mera le ke arsh par hai dimagh

aur hi ab mizaj-e-ali hai

kyun buton ki hamein mohabbat di

kya musibat KHuda ne Dali hai

wan kabhi ghair se kabhi hum hain

roz mauqufi aur bahaali hai

de ke ek bosa-e-lab-e-jaan-baKHsh

tan-e-be-jaan mein jaan Dali hai

kya bala gori gori rangat par

zulf kali hai aankh kali hai

haal mein shairi ka hai ye Dhang

apna jo sher hai wo haali hai

dekho mujh par bahut sitam na karo

pas ai jaan kotawali hai

hum se inkar wasl ka hai abas

hogi jo baat hone wali hai

un ke kuche mein KHak ho jaen

hum ne ek rah ye nikali hai

yar pahlu mein hai na jam-e-sharab

ye bhi KHali hai wo bhi KHali hai

hai sitam ye anile-pan ka banao

kan mein ek ek baali hai

us ke mazhab ka eatibar hai kya

'mehr' ek rind-e-la-ubaali hai