zulf-e-jaanan pe tabiat meri lahrai hai

zulf-e-jānāñ pe tabī.at mirī lahrā.ī hai

saañp ke muñh meñ mujhe merī qazā laa.ī hai

aaj mai-ḳhāne pe ghanghor ghaTā chhā.ī hai

ek duniyā hai ki piine ko umaD aa.ī hai

zulf-e-shab-rañg kā hai aks ye paimāne meñ

yā parī koī ye shīshe meñ utar aa.ī hai

tū batā nāvak-e-jānāñ tirī kyā hai nīyat

ḳhanjar-e-yār ne to sar kī qasam khaa.ī hai

huur o ġhilmāñ mirī āñkhoñ meñ samā.eñ kyuuñ kar

kis meñ terī sī adā terī sī rānā.ī hai

kuchh mudāvā na huā tum se marīz-e-ġham kā

kyā isī barte pe dāvā-e-masīhā.ī hai

surḳhi-e-ḳhūn-e-shahīdāñ kī jhalak hai is meñ

dast-e-qātil pe ġhazab rañg hinā laa.ī hai

zulf-e-jaanan pe tabiat meri lahrai hai

sanp ke munh mein mujhe meri qaza lai hai

aaj mai-KHane pe ghanghor ghaTa chhai hai

ek duniya hai ki pine ko umaD aai hai

zulf-e-shab-rang ka hai aks ye paimane mein

ya pari koi ye shishe mein utar aai hai

tu bata nawak-e-jaanan teri kya hai niyat

KHanjar-e-yar ne to sar ki qasam khai hai

hur o ghilman meri aankhon mein samaen kyun kar

kis mein teri si ada teri si ranai hai

kuchh mudawa na hua tum se mariz-e-gham ka

kya isi barte pe dawa-e-masihai hai

surKHi-e-KHun-e-shahidan ki jhalak hai is mein

dast-e-qatil pe ghazab rang hina lai hai